(1)

It-Trattat tal-Karta tal-Enerġija (il-“Ftehim”) ġie konkluż mill-Euratom bid-Deċiżjoni tal-Kunsill u tal-Kummissjoni 98/181/KE, KEFA, Euratom (1) u daħal fis-seħħ fis-16 ta’ April 1998.

(2)

Skont l-Artikolu 17(1) tal-Ftehim, kull Parti Kontraenti tirriżerva d-dritt li tiċħad il-vantaġġi tal-Parti III tal-Ftehim lil entità legali jekk persuni biċ-ċittadinanza jew in-nazzjonalità ta’ Stat terz jippossjedu jew jikkontrollaw tali entità u jekk dik l-entità ma jkollha l-ebda attività kummerċjali sostanzjali fiż-żona tal-Parti Kontraenti li fiha tkun organizzata.

(3)

Skont l-Artikolu 17(2), il-punt (b), tal-Ftehim, kull Parti Kontraenti tirriżerva d-dritt li tiċħad il-vantaġġi tal-Parti III tal-Ftehim għal investiment, jekk il-Parti Kontraenti li tiċħad tistabbilixxi li tali investiment ikun investiment ta’ investitur ta’ Stat terz li miegħu jew li fir-rigward tiegħu l-Parti Kontraenti li tiċħad tadotta jew iżżomm miżuri li jipprojbixxu tranżazzjonijiet ma’ investituri ta’ dak l-Istat jew li jinkisru jew jiġu evitati jekk il-benefiċċji tal-Parti III tal-Ftehim jingħataw lill-Investituri ta’ dak l-Istat jew lill-investimenti tagħhom.

(4)

L-Unjoni imponiet b’mod progressiv miżuri restrittivi kontra l-Federazzjoni Russa, inizjalment b’reazzjoni għall-annessjoni illegali tal-Krimea u ta’ Sevastopol u għad-destabbilizzazzjoni deliberata tal-Ukrajna. L-Unjoni espandiet il-miżuri restrittivi b’reazzjoni għar-rikonoxximent taż-żoni mhux ikkontrollati mill-gvern tal-“oblasts” Ukreni ta’ Donetsk u ta’ Luhansk, u d-deċiżjoni li jintbagħtu l-forzi armati Russi f’dawk iż-żoni. B’reazzjoni għall-gwerra ta’ aggressjoni tar-Russja kontra l-Ukrajna, l-Unjoni espandiet b’mod sinifikanti l-miżuri restrittivi.

(5)

Fl-istess waqt, il-miżuri restrittivi introdotti mill-Unjoni li jikkonċernaw lir-Repubblika tal-Belarussja ġew estiżi b’reazzjoni għall-involviment ta’ dan il-pajjiż fil-gwerra ta’ aggressjoni tar-Russja kontra l-Ukrajna.

(6)

La l-Federazzjoni Russa u lanqas ir-Repubblika tal-Belarus ma huma Parti Kontraenti għall-Ftehim. Madankollu, investituri minn dawk il-pajjiżi jistgħu jippruvaw jużaw entitajiet ġuridiċi stabbiliti fit-territorju ta’ Parti Kontraenti għall-Ftehim biex jallegaw li l-Euratom jew l-Istati Membri tagħha aġixxew b’mod inkonsistenti mal-obbligi ta’ protezzjoni tal-investiment tal-Ftehim u b’hekk iressqu proċedimenti għas-soluzzjoni tat-tilwim bejn l-investitur u l-istat kontra l-Euratom jew l-Istati Membri tagħha.

(7)

L-azzjonijiet tal-Euratom u dawk tal-Istati Membri tagħha huma konsistenti mal-Ftehim u ma’ ftehimiet rilevanti oħra u, fi kwalunkwe każ, il-pretensjonijiet fir-rigward ta’ tali miżuri huma preklużi skont l-istrumenti applikabbli u d-dritt internazzjonali ġenerali. Minkejja dan, huwa xieraq li jittieħdu passi proċedurali komplementari biex jiġu evitati proċedimenti għas-soluzzjoni tat-tilwim bejn l-investitur u l-istat minn entitajiet ġuridiċi li huma proprjetà ta’ jew ikkontrollati minn persuni bic-ċittadinanza jew in-nazzjonalità tal-Federazzjoni Russa jew tar-Repubblika tal-Belarussja kontra l-Euratom jew l-Istati Membri tagħha skont il-Ftehim.

(8)

L-Artikolu 17 tal-Ftehim jippermetti lill-Partijiet Kontraenti jiċħdu l-vantaġġi tad-dispożizzjonijiet dwar il-protezzjoni tal-investiment tal-Ftehim lill-investituri minn Partijiet mhux Kontraenti li jfittxu li jabbużaw mill-Ftehim billi jressqu pretensjonijiet ta’ investiment fis-sitwazzjonijiet imsemmija hawn fuq (“ċaħda tal-vantaġġi”).

(9)

Huwa xieraq li jiġi invokat l-Artikolu 17(1) tal-Ftehim fir-rigward ta’ kull entità ġuridika li hija proprjetà ta’ jew ikkontrollata minn persuni biċ-ċittadinanza jew in-nazzjonalità tal-Federazzjoni Russa jew tar-Repubblika tal-Belarussja, u li ma għandha l-ebda attività kummerċjali sostanzjali fiż-żona tal-Parti Kontraenti li fiha hija organizzata. Bl-istess mod huwa xieraq li jiġi invokat l-Artikolu 17(2), il-punt (b), tal-Ftehim fir-rigward ta’ kull investiment fis-sens tal-Ftehim li jkun investiment ta’ investitur tal-Federazzjoni Russa jew tar-Repubblika tal-Belarussja fiċ-ċirkostanzi deskritti f’dik id-dispożizzjoni.

(10)

Iċ-ċaħda tal-vantaġġi skont l-Artikolu 17 tal-Ftehim jenħtieġ li tiġi implimentata mill-Kummissjoni billi tiċċirkola fi ħdan il-Konferenza tal-Karta tal-Enerġija d-Dikjarazzjoni pubblika stabbilita fl-Anness ta’ din id-Deċiżjoni f’isem l-Euratom u l-Istati Membri rilevanti kollha li huma Partijiet Kontraenti għall-Ftehim jew li huma ex Partijiet Kontraenti li fit-territorji tagħhom il-Ftehim ikompli japplika, skont l-Artikolu 47(3) tal-Ftehim.

(11)

Din id-Deċiżjoni hija mingħajr preġudizzju għad-dritt tal-Unjoni, il-Euratom u l-Istati Membri kollha li jinvokaw l-Artikolu 17 tal-Ftehim fir-rigward ta’ investitur jew investiment separatament u fi kwalunkwe mument xieraq,